العلم كالماء والهواء
 
الرئيسيةالبوابةاليوميةمكتبة الصورس .و .جبحـثالأعضاءالمجموعاتالتسجيلدخول

شاطر | 
 

 شاعر دمه خفيف يقول للمدح لا ويقول للردح نعم

اذهب الى الأسفل 
كاتب الموضوعرسالة
محمدوليد
الإدارة والإشراف العام
avatar

عدد المساهمات : 374
تاريخ التسجيل : 29/10/2009

مُساهمةموضوع: شاعر دمه خفيف يقول للمدح لا ويقول للردح نعم   السبت يناير 16, 2010 4:38 pm



جئت لكم اليوم بشعر باللهجة العامية يارب يعجبكم
وعلى فكرة أنا لست أعلم إسم الشاعر كاتب الموضوع

************



عتاب بصوت عالى جدااااااااا جايب لآخر الحارة
دار بين هو و هى

فكان هذا الحوار




هو




مش هسيبــِك تخلعينى




على إيه جَيّه تلومينى
دا انتِ حقــِّـك تشــكرينى

زعلانة انى بعدت عنك
ما انت زمان طلـّعْـتى عينى



على إيه جَيّه تلومينى



********



كل شئ جايز بالخناق
إلا الغــرام بالاتفــاق

حلفت براس عــلاء
إنك مش هتشــوفينى

على إيه جيّه تلومينى



******



فاكرة أيـــام الخطوبـــة
لما كنتى ف شهر طوبة

يا إما نروح نفق العروبة
يا إما بالطوب تبطحينى



على إيه جَايّه تلومينى



********



لو خرجنا تغـَرَّمِـينى
ولو قعدنا تبَسْــتـِفينى

ولما أقوللِك إرحمينى
ألاقى شبشب جاى ف عينى



على إيه جَيّه تلومينى



********



لو جبتلك ف يوم زيارة
عود قصب وكام خيارة

تعمليلى ألف غـــارة
وف الحوارى تفضحينى



على إيه جَيّه تلومينى



********



ولو مسكت إيديكى تِهْرِى
ولو نـَدَهْت عليكى تجرى

وتقوليلى آه ياضهرى
وتستخبـّى وتسيبينى



على إيه جَيّه تلومينى



********



وف الفرح والناس سعيدة
وكنتْ بالبدلة الجديدة

ألقاك ماسكالى حديدة
كنتِ نفسِك تضربينى



على إيه جَيّه تلومينى



********



رجعت بدرى ف يوم خميس
نفسى أحس إنى عريس



لقيت ف إيدِك عود سِريس
وهات يا أكل وتطنشينى



على إيه جَيّه تلومينى



********



وبعد الفرح بتلات شهور
روّحْت ومعايا عودين زهور

شخطتى فىَّ ياعم غور
قلتلك ليـه بتكرهـينى



على إيه جَيّه تلومينى



********



وبـعد سـبع سـنيـن خلـِّــفـت
كنت يوماتى بتغدّا لفت

وياريت عاجب تقوليلى يازفت
إمشى غور لحْسَنْ ودِيـنى .....



على إيه جَيّه تلومينى



********



و ع الحال ده سنين طوال
كنت بتنامى زى الشوال

قلتْ انام جنب العيـــال
عشان ليلاتى بتِسْرعينى



على إيه جَيّه تلومينى



********



أخدت سُلفة من صديقى
وقلتـلـِك بالله عليــكى

نفسى أكلـَـة من إيديكى
كنت عايزة تعوَّرينى



على إيه جَيّه تلومينى



********



دا انتِ عيشتِك بالخسارة
مابتفهميش زى الحمارة

معندكيش غير البصارة
تعمِـلى وتأكـّلـِيـــنى



على إيه جَيّه تلومينى



********



لو طبخنا طبخة عـِدْلـَة
قرنبيط أو حتى رجْلـَة

أو عملتى صحن عِجـَّة
تبقى عايزة توزّعينى



على إيه جَيّه تلومينى



********



كل حى يروح لحالـُه
وكل واحد يهدا بالـُه

والغرام لمِّيت عِزَالـُه
وهريَّحِك وتريَّحيــنى



على إيه جَيّه تلومينى



********



نويت خلاص أقول يافكيك
واخلص منـِّك بطريقة شيك

كده اهُو ومن غير تـَمَاحِـيك
ومش هسيبك تخلعينى



على إيه جَيّه تلومينى



********



هاخدلى واحدة زى سوسو
تحفظ للراجل فلوسـُـه

ولو ف يوم حَنطور يدوسـُه
تقول دا بعلى وكان شارينى



وماتجيش تانى تلومينى



*************************

ردت هى .. فقالت




عايز تسيبنى مايهمّنيش




إنتَ كمان جاى تتكلم

وتشتكينى وتتظلـّــم

أنا أصلى مش بتعلم

مفروض هربت و ما تاخدنيش

عايز تسيبنى ما يهمنيش



***********

ياقارفنى ف عيشتى يامدّهول

خليتنى قرّبت أتسَـــوّل

أنا برضو قلت من الأول

الراجل دا يامّه ماينفعنيش

عايز تسيبنى ما يهمنيش



***********

ماددلى كرشك زى التور

وكلامك مش نازل م الزور

عامل لى نفسك واد دبّور

وانتَ زى خيبتـَك مالاقيش

عايز تسيبنى ما يهمنيش



***********

نسيت أيــام الخطوبة

لما جيتنى بشبشب كركوبة

ياإما تخلـّى بيتنا خرابة

يا إما تروح لأمّك ما تجيش

عايز تسيبنى ما يهمنيش



***********

كان شكلك زى المحروم

ببنطلون تحفة و مصروم

وقميصك كان كله خروم

وعامل لى قال شعرك كانيش

عايز تسيبنى ما يهمنيش



***********

لو خرجنا مافيش غير فول

ولو قعدنا ما تعرفش تقول

وتعمل لى نفسك قال مشغول

علشان ما نروحش الكورنيش

عايز تسيبنى ما يهمنيش



***********

كنت فاكرة انك واد فِتّ

ألاقيك عمّـال تعجن وتلِتّ

بدل ما تجيبلى علبة تواليت

داخل عَلـَيـّا بعلبة ورنيش

عايز تسيبنى ما يهمنيش



***********

رفضت تكتبــلى القايمــة

قال يعنى دى حاجات مش دايمة

حتى أمى على عومك عايمة

دا جلدة يامّه ما تغصبينيش



عايز تسيبنى ما يهمنيش



***********

وف الفرح والناس موجودة

قال لابسلى الحته الموضة

وجايبلى شنطة عيش سودا

قدّام الناس نازل قرميش

عايز تسيبنى ما يهمنيش



***********

دخـّلتنى على فرشة أمى

وشحتـّلك أنا بدلة عمى

وقلت لنفسى يابت اتلمّى

أهو راجل أحسن من مفيش

عايز تسيبنى ما يهمنيش



***********

ياللى كان يشجيك أنينى

لما كان ف بطنى جنينى

كنت بسخر من حنينى

لكنتالوب وجبنة قريش

عايز تسيبنى ما يهمنيش



***********

أهبل وعبيط وشبه خالك

كمان بخيل حتى على عيالك

ياك فاكرنى عاشقة جمالك

عشان عيالى انا عايزة أعيش



عايز تسيبنى ما يهمنيش



***********

لما أقول لك سيب مصروف

تقعد تنفخ وتقول يا رؤوف

وتقول لى إعملى معروف

بصراحة فلوس تانى ماعنديش

عايز تسيبنى ما يهمنيش



***********

أعمل لك أكل بقى إزاى

وانت قلت إنك مش جاى

رايح لامَّك تشرب شاى

أنا قلت ياريته يغور ما يجيش

عايز تسيبنى ما يهمنيش



***********

إيه يعنى لو ماشربتش شاى

تفضحنى للرايح والجاى

بتخوّفنى لما تقول باى باى؟

عايز تسيبنى ــ طظ ــ ما يهمنيش



***********

عمّال تزعّق ف الحاره

وتشتكى للجار والجاره

ايه يعنى لو كلت بصاره

مانتَ بُخلك زيُّه مافيش



عايز تسيبنى ما يهمنيش



***********

جايبلى اصحابك الغجر

د انا اللى كنت هنفجـِر

قاعدين ترصّوا ف كام حجر

ومضيّع فلوسك ع الحشيش



عايز تسيبنى ما يهمنيش



***********

معرفش انام منك بالليل

من شخيرَك شفت الويل

واصوات تطلع منك بالحِـيْـل

عامله زى موسيقى الجيش



عايز تسيبنى ما يهمنيش



***********

لبسْـتـلك من كل إشِـى

المستكوفى والشِـفتـِشى

الأحمـــريكا والمشمشى

حتى نظرك بقى شيش بيش

عايز تسيبنى ما يهمنيش



***********

انتَ خلاص هتجننى

ياعم غور ابعد عنى

دا انت ليلتك ليله بنى

ما ينفعش معاك إلا التطفيش

عايز تسيبنى ما يهمنيش



***********

هشوفلى واحد شكله وسيم

مش حمار بياكل برسيم

راجل رومانسى زى حليم

وكلامه ينـَخـْشِـشْ ف النـَخاشيش

عايز تسيبنى ما يهمنيش



***********

هتسيبنى بأه ولا أخلعك

واتنيّل لعمى يسمعك

يقول لك فيــن يوجعك

ماتلحقش تروح مستشفى أبو الريش



عايز تسيبنى ما يهمنيش








الرجوع الى أعلى الصفحة اذهب الى الأسفل
lama_new
عضو ذهبي
عضو ذهبي
avatar

عدد المساهمات : 220
تاريخ التسجيل : 07/11/2009
الموقع : بيتنا

مُساهمةموضوع: رد: شاعر دمه خفيف يقول للمدح لا ويقول للردح نعم   الأحد يناير 17, 2010 1:31 am







هههههههههههههههههههههههههههههههههههههههههههه




الرجوع الى أعلى الصفحة اذهب الى الأسفل
محمدوليد
الإدارة والإشراف العام
avatar

عدد المساهمات : 374
تاريخ التسجيل : 29/10/2009

مُساهمةموضوع: رد: شاعر دمه خفيف يقول للمدح لا ويقول للردح نعم   الأحد يناير 17, 2010 4:21 pm

الرجوع الى أعلى الصفحة اذهب الى الأسفل
 
شاعر دمه خفيف يقول للمدح لا ويقول للردح نعم
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
مدرسة الشهيد مرزوقة :: ديوان الأدب :: ركن شعر المشاهير والمنقول-
انتقل الى: